Жыл сайын 1 наурызда Дүниежүзілік Азаматтық қорғаныс күні атап өтіледі. 1931 жылы бірнеше мемлекеттердің бастамасы бойынша Француз медицина қызметінің генералы Жорж Сен-Пол Парижде барлық елдерде жергілікті қауіпсіздік аймақтарын екіжақты және көпжақты келісімдер арқылы құру үшін «Женева аймақтарының қауымдастығын» — «қауіпсіздік аймақтарын» құрды.

Кейіннен қауымдастық Халықаралық Азаматтық қорғаныс ұйымы (ХАҚҰ) болып қайта құрылды. 1972 жылы ХАҚҰ үкіметаралық ұйым мәртебесін алды. Қазіргі уақытта 58 ел ХАҚҰ-ға мүше мемлекеттер болып табылады, 16 мемлекет бақылаушы мәртебесіне ие.

1990 жылы белгіленген Дүниежүзілік Азаматтық қорғаныс күні әлемдік қоғамдастықтың назарын Азаматтық қорғаудың мәніне аудару және зілзала немесе авария жағдайында халықтың өзін — өзі қорғауға дайындығын арттыру, сондай — ақ азаматтық қорғаудың ұлттық қызметтері персоналының апаттарға қарсы күрестегі күш-жігері мен өзін-өзі құрбан етулеріне құрмет көрсету мақсатында ХАҚҰ-ға мүше елдерде атап өтіледі.

1 наурыз күні кездейсоқ таңдалған жоқ. Дәл осы күні ХАҚҰ Жарғысы күшіне енді, оны 18 Мемлекет мақұлдады.

ХАҚҰ қызметінің бағыттары арасында мыналарды бөліп көрсетуге болады: Төтенше жағдайлар кезеңінде басқару саласында ұлттық кадрлар даярлау; мемлекеттерге төтенше жағдайлардың алдын алу және халықты қорғау жүйелерін құру мен жетілдіруде техникалық көмек көрсету; азаматтық қорғаныс және төтенше жағдайлар кезеңінде басқару мәселелері бойынша тәжірибе мен білімді насихаттау.

Қазақстан Республикасы ТЖМ 1997 жылы Халықаралық Азаматтық қорғаныс ұйымына кірді және осы ұйым өткізетін барлық негізгі
іс-шараларға қатысады.

Дүниежүзілік Азаматтық қорғаныс күні жыл сайын жаңа ұранмен өтеді. Биыл Дүниежүзілік Азаматтық қорғаныс күні «Азаматтық қорғаныс және апаттар мен дағдарыстар кезінде жер аударылған адамдармен жұмыс; еріктілердің рөлі және пандемиямен күрес» ұранымен өтеді. Дүниежүзілік Азаматтық қорғаныс күнін мерекелеу жөніндегі барлық іс-шаралар халықтың төтенше жағдайлар кезіндегі іс-қимылдар бойынша хабардарлығын арттыруға бағытталған.